Maendeleo ya Jamii ni taaluma ya ujenzi na utaalamu wa kuiwezesha Jamii kujenga Jamii endelevu iliyojiamini yenye kujitambua na yenye uwezo wa kujitambua na kushiriki shughuli mbalimbali za maendeleo kwa misingi ya haki na usawa.
Taaluma hii inawezesha jamii kubaini, mahitaji, fursa, kubuni, kuandaa, kupanga na kutekeleza miradi mbalimbali ya kujiletea maendeleo endelevu.
Maendeleo ya Jamii inawezesha Jamii kufahamu fursa za kiuchumi, kijamii, kiteknolojia, na kiutamaduni kama njia muhimu ya kuongeza kipato kwa jamii na kupunguza/kuondoa umaskini, kupigania usawa wa kijinsia, Maendeleo ya kielimu na Maarifa ya Matumizi mazuri ya fursa Sayansi na Teknolojia katika kujiletea Ustawi wa Maisha ya Familia, Jamii na Taifa kwa ujumla.
Katika kutekeleza utaalamu huu kwa sekta mtambuka inayounganisha majukumu yake na sekta zingine wataalamu wa Maendeleo ya Jamii wana wajibu ufuatao;
Kubuni, kupanga, kushirikisha na kutekeleza miradi mbalimbali inayoibuliwa na jamii kwa ajili ya kujiletea maendeleo.
Kuandaa jamii iweze kujitathimini na kujitafiti hali zao za kimaisha na kuzifahamu changamoto zinazohitaji kufanyiwa marekebisho na maboresho ili waweze kusonga mbele kimaendeleo.
Kuwezesha jamii kufahamu fursa na rasrimali zilizopo katika jamii yao na kutatua matatizo yao.
Kuwa kiunganishi kati ya wananchi, viongozi, asasi za kiraia na mashirika kuanzia ngazi ya chini (Vijiji, Mitaa, Kata,Wilaya, Mikoa hadi Taifa)
Kutafisri sera miongozo kanuni na mipango mbalimbali ya kimaendeleo kwa ajili ya utekelezaji katika ngazi ya jamii kuanzia ngazi ya chini kwenda juu (Bottom up Approach)
Kuhamasisha Umma kushiriki katika kutekeleza sera mtambuka kama vile UKIMWI, MKURABITA, UWEZESHAJI WANANCHI, UKATILI WA KIJINSIA na kampeni mbalimbali kujishughulisha na kuingiza masuala mtambuka katika mipango ya Vijiji, Kata, Halmashauri katika kuandaa utekelezaji wa sera na program za maendeleo.
Kuhamasisha jamii wawe tayari kwa mabadiliko chanya yenye manufaa kwao, kwa mtu mmoj mmoja kupitia vikundi vya ujasiliamali, sanaa n.k
Kutoa mafunzo ya vikundi vya Vijana na Wanawake yanayohusu uanzishaji wa Biashara, Utunzaji wa fedha, Uongozi na Ujasiriamali.
MAJUKUMU YA MSINGI YA MAENDELEO YA JAMII YAMEJIKITA KATIKA MAENEO YAFUATAYO;
Kuraghibisha na kuhamasisha jamii kujiletea maendeleo endelevu “kujitambua/ kutambua fursa na rasilimali”
Kuratibu mipango mbalimbali ya Serikali, Taasisi, Asasi pamoja na huduma zingine zinazotolewa na wadau pamoja na mitandao mbalimbali.
Kuwezesha na kuunganisha jamii na vikundi na taasisi, asasi na Serikali kwa ujumla ili kupata rasilimali (huduma, mitaji na mikopo)
kuingiza masuala mtambuka katika mipango ya maendeleo kwa ngazi zote (Vijijini - Halmashauri)
KUSHIRIKISHA Jamii na wadau mbalimbali katika kutambua, chambua na kutekeleza kazi za kujiletea maendeleo.
